កណ្តាល៖ រថយន្តម៉ាក Lexus RX 330 មួយគ្រឿង ដែលមានបិទឡូហ្គោក្រសួងមហាផ្ទៃ ពាក់ស្លាកលេខ នគរបាល 8768 បានរេចង្កូតបុករបងសាលាដំបូងខេត្តកណ្ដាលបាក់អស់មួយចំនួន កាលពីម៉ោង ១១និង២៣នាទីយប់ថ្ងៃទី៧ ខែវិច្ឆិកា ឆ្នាំ២០២២ម្សិលមិញ។

ក្នុងហេតុការណ៍ខាងលើ បានបណ្ដាលឱ្យបុរសជាអ្នករត់ម៉ូតូកង់បីរងរបួសបែកក្បាលហូរឈាម ខណៈជនបង្កបានព្យាយាមបើករត់គេច រួចយករថយន្តទៅផ្លុងចោលនៅក្នុងភូមិស្ទឹងជ្រៅ សង្កាត់ព្រែកឬស្សី ក្រុងតាខ្មៅ ខេត្តកណ្តាល។

តាមការឱ្យដឹង រថយន្តខាងលើបើកបរពីភ្នំពេញចុះមកតាខ្មៅ លុះដល់ចំណុចកើតហេតុ គេចចង្កួតមិនទាន់ក៏ជ្រុលទៅបុករបងសាលាដំបូងខេត្តកណ្តាលបណ្ដាលឲ្យបាក់មួយចំនួន រួចជ្រុលទៅបុកម៉ូតូកង់បីចតចោលចាំមូយ បណ្ដាលឲ្យម្ចាស់កង់បីរងរបួសបែកក្បាល។

បច្ចុប្បន្នសមត្ថកិច្ចកំពុងធ្វើការស្រាវជ្រាវ និងឲ្យជនបង្កមកទទួលខុសត្រូវលើករណីនេះ៕